पालघर बोईसर रस्त्यावर उमरोळी पेट्रोल पंपनजीक तीन वाहनात विचित्र अपघात झाला आहे. या अपघातांमध्ये उमरोळी येथील ईको चालक सुनील मोरेश्वर गावड (३२) याचा मृत्यू झाला आहे. तर या दोन जणांना गंभीर दुखापत झाली आहे. उमरोळी पेट्रोल पंप परिसरात इको प्रवासी वाहन, खाजगी चारचाकी व दुचाकीचा एकमेकांना धडकून विचित्र अपघात झाला. हा अपघात इतका भीषण होता की अपघातात इको कार चालकाचा मृत्यू झाला. अपघात घडल्यानंतर दुचाकीवरील दोघे जण गंभीर जखमी अवस्थेत रस्त्याच्या कडेला झाडीत फेकले गेले होते. अपघात घडल्यानंतर मोठी गर्दी जमली. मात्र कोणीही या जखमींना उचलण्यास तयार नव्हता. तिथे उपस्थित असलेल्या मितेश प्रभाकर पाटील,अमोल पाटील व आशिष कुडू या तीन मित्रांनी प्रसंगावधान राखत जखमींना नजीकच्या खाजगी रुग्णालयात दाखल केले. मात्र यात इको चालकाचा मृत्यू झाल्याचे डॉक्टरांनी घोषित केले.तर अपघातात इतर दोघांना गंभीर इजा झाल्याने त्यांना उपचारासाठी मुंबईतील रुग्णालयात हलविण्यात आले आहे. या घटनेची माहिती रुग्णालय प्रशासनाने पोलिसांना दिली आहे.
