लोकसत्ता प्रतिनिधी अकोला : अकोल्यात आणखी एक जणाचा मृत्यू व नऊ नवीन रुग्णांची नोंद गुरुवारी करण्यात आली. आज एका ८० वर्षीय रुग्णाचा उपचारादरम्यान रुग्णालयात मृत्यू झाला. ते फिरदोस कॉलनी येथील रहिवासी होते. या रुग्णाला १५ मे रोजी दाखल करण्यात आले होते. १७ मे रोजी करोना तपासणी अहवाल सकारात्मक आला होता. आज उपचारादरम्यान मृत्यू झाला. दरम्यान, आज नऊ नवीन रुग्णाची भर पडल्याने एकूण रुग्ण संख्या ५१६ झाली आहे. २९ जणांचा मृत्यू झाला असून, ३४९ जणांना रुग्णालयातून सुट्टी देण्यात आली. त्यात रुग्णालयातून आज सोडण्यात आलेल्या ३४ जणांचा समावेश आहे. आज २०१ नमुन्यांचे अहवाल आले. त्यात १९२ नकारात्मक आले. नऊ सकारात्मक आढळलेल्या रुग्णांमध्ये सात पुरुष व दोन महिला आहेत. हे रुग्ण सोनटक्के प्लॉट, सनगर कॉलनी वाशीम बायपास, राऊतवाडी, गायत्री नगर कौलखेड, सिंधी कॅम्प, कमला नेहरू नगर, हरिहरपेठ, तेलीपूरा, गोरक्षण रोड मलकापूर भागातील रहिवासी आहेत.
