अपघाताच्या गुन्ह्यात अडकलेल्या पोलीस अधिकाऱ्याच्या मुलाला वाचवण्यासाठी दोषारोपपत्रासह भलताच बनावट आरोपी उभा केल्याप्रकरणी मुंबई उच्च न्यायालयाच्या औरंगाबाद खंडपीठात याचिका दाखल करण्यात आली आहे. याप्रकरणी न्यायाधीश व्ही. के. जाधव आणि न्यायाधीश एस. सी. मोरे यांनी औरंगाबाद जिल्हा पोलीस अधीक्षक, पोलीस आयुक्तांना नोटीस बजावण्याचे आदेश दिले आहेत. अहमदनगर रोडवरील ढोरेगाव येथील राधिका पेट्रोलपंपासमोर १८ फेबुवारी २०२१ रोजी सकाळी एका कारने मोटार सायकलस्वार बाबासाहेब बोराडे यांना धडक दिली. त्यात त्यांचा मृत्यू झाला. बाबासाहेब यांचे भाऊ पुंजाराम यांनी गंगापूर पोलीस ठाण्यात दिलेल्या तक्रारीआधारे अमरजित बावीस्कर याच्याविरुध्द गुन्हाही दाखल झाला. पण, न्यायालयात मात्र रिक्षाचालक रवि सोनीराम काकडे याच्याविरुध्द दोषारोपपत्र दाखल करण्यात आले. हे दोषारोपपत्र लक्षात घेऊन पुंजाराम बोराडे यांनी अॅड्. रवींद्र गोरे यांच्यामार्फत खंडपीठात याचिका दाखल केली. अमरजित हा पोलीस अधिकाऱ्याचा मुलगा आहे. अपघाताच्या वेळी त्याचा कारचा विमाही काढलेला नव्हता. त्याला नुकसान भरपाईपासून आणि गुन्ह्यापासून वाचवण्यासाठी पोलिसांनी बनावट आरोपी उभा केला आहे. गुन्ह्यात सीसीटीव्ही फुटेजचा पुरावा दाखल करणे गरजेचे असताना तो दाखल केलेला नाही. बनावट आरोपी उभा करताना दाखवलेली रिक्षा भंगारमधील आहे. रवि काकडे याचा गंगापूरचा पत्ता दाखवला असला तरी तो तेथे राहात नाही. पंचनाम्यात अमरजित याची कार आणि बाबासाहेब याची मोटारसायकल यांच्यात अपघात झाल्याचा उल्लेख टाळण्यात आलेला आहे. अमरजितच्या कारचे बंपर फुटलेले व त्याला रक्त लागलेले असल्याचे सिध्द करणारा साक्षीदार उपलब्ध आहे. अशा युक्तिवादानंतर न्यायालयाने पोलीस अधीक्षक आणि पोलीस आयुक्तांना नोटीस बजावण्याचा आदेश दिला आहे. या प्रकरणी अॅड्. गोरे यांना अॅड्. चंद्रकांत बोडखे, अॅड्. स्वप्नील मुळे व अॅड्. पल्लवी वांगीकर सहकार्य करत आहेत.
