अभिनेता आदित्य पांचोलीला दिंडोशी सत्र न्यायालयाने १९ जुलैपर्यंत अंतरिम जामीन मंजूर केला आहे. एएनआयने याबाबत ट्विट केले आहे. बलात्कार प्रकरणी आदित्य पांचोली विरोधात २७ जून रोजी मुंबईतील वर्सोवा ठाण्यात एका अभिनेत्रीच्या तक्रारीवरून गुन्हा दाखल करण्यात आला होता. वर्सोवा पोलिसांनी पांचोली विरोधात कलम ३७६, ३२८,३८४, ३४१, ३४२, ३२३, ५०६ कलमांतर्गत गुन्हा दाखल केला होता. प्रकरण १० वर्ष जुनं असल्यामुळे आदित्य विरोधात गुन्हा दाखल करण्यात आला असला तरी, त्याच्याविरूद्धचे पुरावे गोळा करणं हे कठीण असणार असल्याचे पोलिसांनी सांगितले होते. काही दिवसांपूर्वी आदित्य पांचोलीने हिंदी चित्रपट अभिनेत्री कंगना राणावत व तिची बहिण रंगोली चंदेल यांच्याविरोधात मानहानीचा खटला दाखल केला होता. यानंतर न्यायालयाने या दोघींना याप्रकरणी न्यायालयासमोर हजर राहण्याचे आदेश दिले होते.
