घेतलेले कर्ज फेडता येत नसल्याने मानसिक तणाव आलेल्या दिनेश झापडिया (२५) या तरुणाने रविवारी संध्याकाळी राहत्या घरी गळफास घेऊन आत्महत्या केली. अंधेरी पश्चिम येथील जुहू गल्ली येथे तो राहत होता. कर्जफेडीसाठी वारंवार तगादा लावणारे लोक घरी येत असल्याचे पाहून या मुलाच्या वडिलांनी त्याला दटावले होते. त्यानंतर या तरुणाने टोकाचे पाऊल उचलले.बीएमसी चाळीत राहणाऱ्या दिनेशने विविध लोकांकडून कर्ज घेतले होते. मात्र ते वेळेवर फेडणे त्याला शक्य होत नव्हते. परिणामी कर्जदार रोज त्याच्या घरी येऊन परतफेड करण्याचा धोशा लावत होते. रोजच्या या प्रकारामुळे दिनेशचे वडिलांनी वैतागून त्याला शनिवारी मारहाण केली होती. त्यामुळे व्यथित झालेल्या दिनेशने रविवारी संध्याकाळी साडेचारच्या सुमारास नायलॉनच्या दोरीने गळफास लावून आत्महत्या केली.
