हत्या झालेली व्यक्ती मारेकऱ्याच्या स्वप्नात येऊन छळत असल्याने नुकतीच एका हत्येच्या प्रकरणाला वाचा फुटली होती. या आरोपीने पोलिसांमध्ये आत्मसमर्पण केले होते, पण हत्या करून फेकलेला मृतदेह सापडत नव्हता. अखेर बुधवारी कुरार पोलिसांनी हा मृतदेह नाल्यातून शोधून काढला आहे. मकबूल हसन सरदार अली याच्या मेव्हणीशी सादिक अली चारमिया याचे प्रेमसंबंध होते. त्यामुळे मकबूलने त्याची हत्या केली. मात्र या हत्येनंतर घाबरलेल्या मकबूलच्या स्वप्नात येऊन सादिक त्याला छळत होता. तू माझी हत्या केली, मी तुला सोडणार नाही, अशा प्रकारची स्वप्ने त्याला पडत होती.
