माहीम येथे भरधाव वेगाने जाणाऱ्या एका इंडिका गाडीने धडक दिल्याने पोलीस हवालदारासह एक महिला गंभीर जखमी झाली आहे. सोमवारी सकाळी माहीमच्या नवीन पोलीस कॉलनी येथे ही घटना घडली.सोमवारी सकाळी पावणेदहाच्या सुमारास भक्ती तांडेल (३०) ही महिला माहीम पश्चिमेच्या रहेजा मार्गावरील नवीन पोलीस कॉलनीसमोरून जात होती. त्यावेळी भरधाव वेगाने आलेल्या इंडिका विस्टा (एम एच ०१- बीडी ८०३६) या गाडीने भक्ती यांना तसेच रस्त्यावर उभ्या असलेले पोलीस हवालदार ज्ञानदेव शिंदे यांना जोरदार धडक दिली. या नंतर या गाडीने उभ्या असलेल्या एका वाहनालाही धडक दिली. या धडकेत तांडेल आणि हवालदार शिंदे गंभीर जखमी झाले. तांडेल यांच्यावर रहेजा रुग्णालयात तर शिंदे यांच्यावर बॉम्बे रुग्णालयात उपचार सुरू आहेत. शिंदे यांच्या पायाला फ्रॅक्चर झाले आहे. माहीम पोलिसांनी वाहनचालक नागेंद्र पुजारी (२०) याला अटक केली आहे.
