उत्तर महाराष्ट्रात मालेगावसह जळगाव शहरात पारा ४२ अंशांपुढे सरकला असताना मंगळवारी जळगाव जिल्ह्य़ाच्या काही भागांत मुसळधार पाऊस झाला. भुसावळ येथे वीज पडून तरुण जागीच ठार झाला. नाशिक जिल्ह्य़ातही पावसाने तुरळक हजेरी लावली. प्रचंड उकाडय़ाने त्रस्त नागरिकांना पावसाने काहीअंशी दिलासा दिला. भुसावळ येथील पंचशील नगरात सायंकाळी मुले क्रिकेट खेळत असतानाच विजांच्या कडकडाटासह पावसाला सुरुवात झाली. त्यातच वीज पडून अश्रफ शहा अल्लबक्ष शहा (१९) हा जागीच ठार झाला. गोलू कादर शहा (१४) यासह इतर दोन लहान मुले गंभीर जखमी झाली. नाशिक शहरासह सटाणा, कळवण या तालुक्यांमध्येही पाऊस झाला.
