लोकसत्ता प्रतिनिधी नाशिक: सिन्नर तालुक्यातील नायगाव परिसरात वन विभागाने लावलेल्या पिंजऱ्यांमध्ये दोन दिवसात दोन बिबटे अडकले. यात एक नर आणि एका मादीचा समावेश आहे. काही दिवसांपासून नायगाव, जोगलटेंभी, सोनगिरी परिसरात दुचाकीवरून जाणाऱ्यांवर बिबट्याने हल्ले केले होते. या पार्श्वभूमीवर, बिबट्याला पकडण्याची मागणी परिसरातील शेतकऱ्यांकडून होऊ लागली होती. आणखी वाचा-अवैध गौणखनिज उत्खनन, वाहतूक आणि साठवणूक; धुळे जिल्ह्यात नऊ महिन्यात दोन कोटीचा दंड वसूल पश्चिम वन विभागाचे पंकज गर्ग, वनसंरक्षक अनिल पवार यांनी परिसरात जाऊन शेतकऱ्यांना सूचना केल्या होत्या. सिन्नर वनपरिक्षेत्र अधिकारी मनीषा जाधव यांच्या मार्गदर्शनाखाली बिबट्याचा मागोवा घेत परिसरातील गावांमध्ये सातत्याने जनजागृती करण्यात येत होती. वन विभागाकडून लावण्यात आलेल्या जाळ्यात एक दीड वर्षाचा नर तसेच दुसऱ्या दिवशी दीड वर्षाची मादी बिबट्या अडकली. या कारवाईत नायगाव ग्रामस्थांचे सहकार्य लाभले.