उरण तालुक्यातील चाणजे गावात एका गाईला जुळी वासरे झाली आहेत. ही जर्सी गाय असून अशा प्रकारची घटना ही दुर्मीळ असल्याचे जाणकारांचे म्हणणे आहे. पशुवैद्यकीय अधिकाऱ्यांनीही चाणजे येथे जाऊन याची माहिती घेतली. शेतीला जोडव्यवसाय म्हणून चाणजे येथील शेतकरी हेमंत लांगी यांनी दुधाचा व्यवसाय सुरू केला आहे. त्यासाठी त्यांनी देशी गाईंसह तीन जर्सी गाईही विकत घेतल्या आहेत. यातील एका जर्सी गाईने एकाच वेळी दोन वासरांना जन्म दिला. ही दोन्ही वासरे वेगवेगळ्या रंगांची आहेत. एकाच वेळी दोन वासरे होणे ही लाखात एकच घटना असल्याचे उरणचे पशु वैद्यकीय अधिकारी अनिल धांडे यांनी सांगितले. या जुळ्या वासरांना पाहण्यासाठी येथे झुंबड उडाली आहे.