चिनी स्मार्टफोन कंपनी वनप्लसनं आपल्या नव्या वनप्लस ८ सीरिजच्या स्मार्टफोनमध्ये एक विशेष कॅमेरा सेन्सर दिला होता. याच्या मदतीनं प्लॅस्टिकच्या वस्तून किंवा कपड्यांच्या आरपार पाहता येत असल्याचा दावा अनेकांकडून करण्यात आला होता.

या सेन्सरला कंपनीनं 'X-ray Vision' कॅमेरा सेन्सर असं नावं दिलं दिलं होतं. परंतु आता या सेन्सरला पूर्णपणे बॅन करण्यात आलं आहे.

वनप्लसनं OnePlus 8 Pro मध्ये इन्फ्रारेड फोटोक्रोम लेन्स दिली होती आणि त्याद्वारे काही विशेष प्लॅस्टिक आणि कपड्यांच्या आरपार पाहता येणं शक्य होतं.

कंपनीनं यापूर्वी हा सेन्सर डिसेबल केला होता. परंतु आता The Sun ने दिलेल्या माहितीनुसार हा सेन्सर कायमचा बॅन करण्यात आला आहे.

तो इन्फ्रारेड फिल्टरच्या मदतीनं फोटोंना युनिक कलर देत होता. परंतु फोनच्या रिव्ह्यू युनिट्समध्ये मात्र याचं एक खास फंक्शन समोर आलं.

अनेक इलेक्ट्रॉनिक्स आणि कपड्यांच्या आरपार याद्वारे दिसत असल्यानं अनेकांनी प्रायव्हसीबाबत शंका उपस्थित केली होती. ग्राहकांच्या प्रतिक्रियांनंतर कंपनीनं एका अपडेटद्वारे ते डिसेबल केलं होतं.

दरम्यान, वनप्लस ८ च्या ग्राहकांना नव्या अपडेटनंतर फोटोक्रोम लेन्सच्या मदतीनं फोटो काढता येणार असल्याची माहिती वनप्लसच्या जनसंपर्क अधिकाऱ्यानं The Sun शी बोलताना दिली.

सॉफ्टवेअर अपडेटनंतर पूर्वीप्रमाणे कोणत्याही प्रकारची समस्या उद्भवणार नाही. बुधवारी जारी करण्यात आलेल्या ऑफिशिअल ब्लॉग पोस्टमध्ये या अपडेटबाबत माहिती देण्यात आली.

या नव्या अपडेटसोबत उत्तम बॅटरी लाईफ आणि परफॉर्मन्समध्येही बदल करण्यात आले आहेत.

OnePlus 8 Pro च्या 'X-ray' फिचरबाबत सर्वप्रथन अमेरिकेतील टेक कमेंटेटर बेन जेस्किन यांनी माहिती दिली होती. तसंच त्यांनी यासंदर्भातील व्हिडीओदेखील शेअर केला होता.