तरुणांकडून झालेली छेडछाड व त्यानंतर कारवाईच्या दृष्टीने पोलिसांनी केलेल्या हलगर्जीपणामुळे भोसरी येथे एका १५ वर्षे वयाच्या मुलीने गळफास घेऊन आत्महत्येचा प्रयत्न केल्याचे प्रकरण उघडकीस आले आहे. संबंधित मुलगी कोमात गेली असून, तब्बल बारा दिवसांपासून तिची मृत्यूशी झुंज सुरू आहे. ही घटना उघडकीस आल्यानंतर विविध सामाजिक व राजकीय मंडळींनी तिच्या पालकांना मदतीचे आश्वासन दिले आहे.रस्त्यावर होणाऱ्या छेडछाडीने ही मुलगी हैराण झाली होती. ३१ डिसेंबरच्या रात्री छेडछाड झाल्यानंतर मुलीच्या पालकांनी तक्रार देण्यासाठी पोलीस ठाण्यात खेटे घातले. त्यानंतर भोसरी एमआयडीसी पोलिसांनी केवळ अदलखपात्र गुन्हा नोंदवला. त्या नैराश्यातूनच मुलीने आत्महत्येचा प्रयत्न केला असल्याचा आरोप तिच्या पालकांनी केला आहे. आत्महत्येचा प्रयत्न झाल्यानंतर हे प्रकरण अंलगट येऊ नये, यासाठी पोलिसांनी नंतर विनयभंगाचा गुन्हा दाखल केला व या प्रकरणी तीन तरुणांना अटक करण्यात आली.
