१२ जणांना घेऊन कोविड सेंटरमध्ये जाणाऱ्या अँब्युलन्सचा अपघात झाला आहे. पुणे-बंगळुरु महामार्गावर सोमवारी दुपारी हा अपघात घडला असून यात १२ जणं जखमी झाले आहेत. चालकाचा वाहनावरील ताबा सुटल्यामुळे ही अँब्युलन्स एका दिशेला झुकल्याने हा अपघात झाला. अँब्युलन्समध्ये बसलेल्या व्यक्तींना किरकोळ जखमा झाल्याचं पोलिसांनी सांगितलं. कोथरुडमधील जय भवानी नगर आणि किश्कींदा नगर भागातून ही अँब्युलन्स १२ जणांना घेऊन बालेवाडी येथील कोविड सेंटरमध्ये जात होती. अँब्युलन्समधील लोकं करोनाग्रस्त होती का याबाबत अद्याप नेमकी माहिती समजू शकलेली नाही. हा अपघात झाल्यानंतर स्थानिक लोकांनी अँब्युलन्समधील व्यक्तींना बाहेर काढत त्यांच्यावर जवळच्या रुग्णालयात उपचार केले.
