पुण्यातील कोंढवा भागात ११ दिवसांचे बाळ शेकोटीत पडून गंभीर भाजल्याची घटना घडली. आईच्या हातून झालेल्या गंभीर चुकीमुळे बाळ रुग्णालयात चिंताजनक अवस्थेत आहे. अग्निशामक विभागाने दिलेल्या माहितीनुसार, कोंढाव्यातील भाग्योदयनगर येथे मोहम्मद सगीर शेख यांची पत्नी सकाळी साडे अकराच्या सुमारास आपल्या ११ दिवसांच्या बाळाला शेकोटीवर शेक देत होत्या. यादरम्यान त्या बाळाला शेकोटी शेजारी ठेवून काही कामानिमित्त घरामध्ये गेल्या. या अगदी थोडक्या कालावधीत बाळाने शेकोटीच्या बाजूला अंग टाकल्याने बाळ शेकोटीत पडले. या घटनेत बाळ गंभीररित्या भाजले असून त्याला खासगी रुग्णालयात उपचारासाठी दाखल करण्यात आले आहे.
