शहापूर : येथील किन्हवली भागात मुंबई पोलीस दलातील पोलीस शिपाई भरत खापरे (३३) याने गळफास घेऊन आत्महत्या केल्याचा प्रकार सोमवारी उघडकीस आला आहे. या प्रकरणाची नोंद किन्हवली पोलीस ठाण्यात करण्यात आली आहे. त्याच्या आत्महत्येचे कारण अद्याप अस्पष्ट आहे. मात्र, आजारपणामुळे त्याने आत्महत्या केली असावी असा प्राथमिक अंदाज पोलिसांकडून वर्तविला जात आहे. किन्हवली येथील अल्याणी भागात भरत खापरे राहत होता. तो मुंबईतील गोराई पोलीस ठाण्यात पोलीस शिपाई म्हणून कार्यरत होता. गेल्या चार-पाच दिवसांपासून त्याची प्रकृती बिघडली होती. त्यामुळे तो घरीच होता. सोमवारी सकाळी ग्रामस्थांना भरत खापरे याचा गळफास घेतलेल्या अवस्थेतील मृतदेह त्याच्या घराबाहेर आढळून आला.
