विभक्त कुटुंबांची बहुसंख्या असणाऱ्या महानगरी संस्कृतीत कुत्रा हा पाळीव प्राणी केवळ घराचे रक्षण करण्यापुरता उरलेला नाही. गर्दीतही एकटय़ा असणाऱ्या माणसांचा तो खऱ्या अर्थाने मूक सोबती असतो. सर्वसाधारणपणे आम्ही कुत्रा पाळला आहे, असे लोक म्हणत असले तरी खरेतर स्वभावाने इमानी असलेला हा प्राणी त्यांना आश्रय देणाऱ्या कुटुंबांना सांभाळीत असतो. सध्याच्या धावपळीच्या आणि ताणतणावाच्या युगात ही प्राणि‘मात्रा’ उपकारक ठरते, असा अनेकांचा अनुभव आहे. त्यामुळे आपापल्या आवडीप्रमाणे देशी-विदेशी अनेक प्रकारचे श्वान नव्या ब्लॉक संस्कृतीत आढळतात. सकाळ-संध्याकाळी या श्वानांसोबत फेरफटका मारणारी अनेक मंडळी शहरी भागात दिसते. अलीकडेच डोंबिवलीत एका सौंदर्यस्पर्धेनिमित्त अनेक श्वान एकाच ठिकाणी पाहायला मिळाले. - दीपक जोशी
