खग्रास सूर्यग्रहाण पाहण्याचा मनमुराद आनंद सोमवारी २१ ऑगस्टला अनेकांनी लुटला. प्रशांत महासागर, उत्तर आणि दक्षिण अमेरिकेतील काही भागात, यूरोपच्या पश्चिम आणि उत्तर भागात, पूर्व आशिया आणि वायव्य अफ्रिका या भागांमध्ये खग्रास सूर्यग्रहण दिसले. तेव्हा जगभरातील खगोलप्रेमी ग्रहण पाहण्यासाठी घराबाहेर पडले होते. तब्बल ९९ वर्षांनी अमेरिकेत खग्रास सूर्यग्रहण दिसले. अमेरिकतेल्या १४ राज्यांमध्ये वेगवेगळ्या वेळात हे ग्रहण दिसले. अमेरिकेचे राष्ट्राध्यक्ष डोनाल्ड ट्रम्प आणि मेलानिया ट्रम्प यांनी देखील व्हाईट हाऊसच्या बाहेर येऊन निसर्गातील एक असामान्य घटना पाहण्याचा आनंद लुटला. सकाळी १०. वाजून १५ मिनिटांनी ऑरेगनमध्ये सूर्यग्रहण दिसले. दुपारी २. ५० मिनिटांनी हे ग्रहण संपले. सूर्य पूर्णपणे झाकोळला गेल्यानं भरदुपारी अंधार झाला होता. ज्या लोकांना ग्रहण पाहता येणं शक्य नव्हतं अशासाठी नासानं लाइव्ह टेलिकास्टही केलं होतं. अमेरिकेतल्या अनेक कंपन्यांनी या दिवशी कर्मचाऱ्यांना सुट्टी जाहिर केली होती.
