पुण्यात चालकाने पोलीस कॉन्स्टेबलला गाडीच्या बोनेटवरुन फरफटत नेल्याची धक्कादायक घटना समोर आली आहे. मुंढवा सिग्नल चौकात वाहतूक नियमनाचे काम करणार्‍या पोलिसाने एका चारचाकी वाहनचालकाला मागील दंड भरण्यास सांगत अडविण्याचा प्रयत्न केला असता त्याने अंगावर गाडी घातली आणि ८०० मीटरपर्यंत फरफटत नेलं. घटनेचा व्हिडीओ सध्या व्हायरल होत आहे. पोलिसांनी याप्रकरणी चालकाला ताब्यात घेतलं आहे. मिळालेल्या माहितीनुसार, पोलीस हवालदाराने दंडाची थकीत रक्कम ४०० रुपये भरण्यास सांगितल्याने कार चालकाने अंगावर गाडी घातली. प्रशांत श्रीधर कांतावर असं या चालकाचं नाव असून पोलिसांनी त्याला अटक केली आहे. मुंढवा सिग्नल चौकात खराडी बायपास रोड दरम्यान शुक्रवारी दुपारी ही घटना घडली. पोलीस हवालदार शेषराव जायभाय यांनी मुंढवा याप्रकरणी पोलीस ठाण्यात फिर्याद दिली. त्यानंतर ही अटकेची कारवाई करण्यात आली. काही अंतरावर वाहनचालकाला पकडण्यात यश आलं असून त्याला ताब्यात घेतलं आहे. आरोपीच्या विरोधात गुन्हा दाखल करण्यात आला असून या घटनेत पोलिस कर्मचारी शेषराव जायभाय जखमी झाले असल्याचे मुंढवा पोलिसानी सांगितलं.
