स्वामी विवेकानंद यांच्या १५० व्या जयंतीनिमित्त शनिवारी आयोजित करण्यात आलेली शोभायात्रा नागरिकांच्या उत्स्फूर्त प्रतिसादात साजरी झाली. ठाण्यातील कळवा ते विटावा या भागांमध्ये शोभायात्रा काढण्यात आली होती. ‘स्वामी विवेकानंद सार्धेशती समिती’ तर्फे यात्रेचे आयोजन करण्यात आले होते. कष्टकरी महिलांच्या हस्ते यात्रेचे उद्घाटन करण्यात आले. स्वामी विवेकानंद यांच्या प्रतिमा, त्यांच्या विविध संदेशांचे फलक यात्रेत सहभागी झालेल्या नागरिकांनी यावेळी झळकाविले. विद्यार्थ्यांनी पारंपरिक वेशभूषा परिधान करून यात्रेत सहभाग घेतला होता. यात्रेत सादर करण्यात आलेल्या लेझिम नृत्याने सर्वाचे लक्ष वेधून घेतले होते. टीजेएसबी सहकारी बँकेचा यात्रेतील सहभाग उल्लेखनीय होता. ठाण्याच्या विविध भागांतील नागरिक मोठय़ा उत्साहाने यात्रेत सहभागी झाले होते.
