जिल्ह्यातील पेठ येथील वृध्द दाम्पत्य शेजारील गुजरातमध्ये असलेल्या शेतात मुक्कामी असतांना रविवारी रात्री दरोडेखोरांनी चोरीच्या हेतूने केलेल्या हल्ल्यात ठार झाले. हे दोघेही पेठचे सरपंच सुरेंद्र गाडगीळ यांचे आई-वडील आहेत. सरपंच तथा शिवसेनेचे पदाधिकारी सुरेंद्र गाडगीळ यांचे गुजरातच्या सीमेजवळ शेत आहे. या शेतात सुरेंद्र यांचे आई-वडील रविवारी मुक्कामास गेले होते. रात्रीच्या सुमारास चोरीच्या उद्देशाने काही जणांनी घरात प्रवेश केला. पुंडलिक गाडगीळ (७५) व गोदाबाई गाडगीळ (७०) यांना चोरटय़ांची चाहूल लागल्याने त्यांनी प्रतिकार करण्याचा प्रयत्न केला. चोरटय़ांनी केलेल्या हल्ल्यात गाडगीळ दाम्पत्य जागीच ठार झाले. दुसऱ्या दिवशी सकाळी आजूबाजूच्या रविवाश्यांच्या हा प्रकार लक्षात आल्यानंतर पोलिसांनी घटनास्थळी धाव घेतली. दरम्यान, या घटनेची गुजरातमधील करपाडा पोलीस ठाण्यात नोंद करण्यात आली आहे.
