तांत्रिक विश्लेषणाच्या दृष्टिकोनातून पुढील आठवडय़ातील निर्देशांकांची आणि प्रमुख समभागांची संभाव्य वाटचाल.. गेल्या आठवडय़ात या स्तंभात एक महत्त्वाचे वाक्य होते- ‘‘सेन्सेक्ससाठी ३०,३५० आणि निफ्टीसाठी ९,४५० या महत्त्वाच्या ‘कलनिर्धारण पातळ्या’ असतील. या स्तरावर निर्देशांक टिकल्यास त्यांचे प्रथम वरचे उद्दिष्ट अनुक्रमे ३०,७००/९,५५० आणि दुसरे उद्दिष्ट ३१,०००/९,६५० असे असेल.’’ या आठवडय़ात निर्देशांकांनी स्थितप्रज्ञता झटकून टाकत, आपले प्रथम वरचे उद्दिष्ट ३१,००० / ९,५५० गाठलेले आपल्याला दिसले. पुढील आठवडा कसा? शुक्रवारचा बंद भाव : सेन्सेक्स- ३१,०२८.२१ निफ्टी - ९,५९५.१० येणाऱ्या दिवसात निर्देशांकाला ३०,२५०/ ९,३५० या पातळ्याचा भरभक्कम आधार आहे व बाजारातील तेजीची उमेद, उत्साह टिकून राहाण्यासाठी सेन्सेक्ससाठी ३०,३५० आणि निफ्टीसाठी ९,४५० या जुन्याच कलनिर्धारण पातळ्या असतील. निर्देशांक सातत्याने हा स्तर टिकविण्यात यशस्वी ठरल्यास निर्देशांकाचे प्रथम वरचे उद्दिष्ट ३१,००० / ९,६५० आणि नंतर ३१,२५० ते ३१,५०० / ९,७५० ते ९,८०० चा नवीन उच्चांक दृष्टिपथात येईल. सोन्यातील कल गेल्या वेळेच्या लेखातील ‘सोने विरुद्ध सेन्सेक्स द्वंद्व’ या परिच्छेदात सोन्याच्या भावाला रु. २८,५०० ही महत्त्वाची कलनिर्धारण पातळी असा उल्लेख आला होता व हा स्तर टिकविण्यात सोन्याचा भाव यशस्वी ठरल्यास रु. २८,९०० हे प्रथम वरचे उद्दिष्ट असेल असे सूचित केले होते ते गुरुवार १८ मे रोजी साध्य झाले. सद्य:स्थितीत सोन्याचा मार्गक्रमण पट्टा हा २८,५०० ते २९,००० असेल.( सोन्याचे भाव एमसीएक्सवरील व्यवहाराचे आहेत.)