शहापूर तालुक्यातील नडगाव येथील किसान हायस्कूलमधील शिक्षकाच्या आत्महत्येप्रकरणी याच शाळेत शिकविणाऱ्या सात शिक्षक तसेच कर्मचाऱ्यांना जबाबदार धरून शहापूर पोलिसांनी त्यांच्याविरुद्ध गुन्हा दाखल केला आहे. सर्व आरोपी अद्याप फरार आहेत.येथील किसान हायस्कूलमधील शिक्षक दत्तात्रय भांडे यांनी २५ डिसेंबर रोजी विषप्राशन करून आत्महत्या केली होती. शाळेतील सहकर्मचाऱ्यांचा त्रासाला कंटाळूनच आपल्या पतीने आत्महत्या केल्याचा आरोप त्यांच्या पत्नी आशा यांनी तक्रारीत केला आहे. कोणताही दोष नसताना आपल्या पतीवर कॅटलॉग हरविल्याचा ठपका ठेवण्यात आला होता. याआरोपावरून त्यांना सतत मानसिक त्रास देण्यात येत होता. मद्यपान करीत असतानाचे फोटो दाखवून त्यांना बदनाम करण्याची धमकी दिली जात होती, असाही आरोप त्यांच्या पत्नी आशा यांनी केला आहे.
