24 September 2020

News Flash

सलग सहाव्या महिन्यांत निर्यात घसरण

ऑगस्टमध्ये १३ टक्क्यांनी ढासळली; व्यापार तूट मात्र नियंत्रणात

(संग्रहित छायाचित्र)

करोना कहराच्या प्रादुर्भावाआधीच ढासळलेल्या देशाच्या निर्यातीत सरलेल्या ऑगस्टमध्ये सलग सहाव्या महिन्यांत घसरणीचा क्रम सुरूच असल्याचे मंगळवारी केंद्र सरकारने प्रसिद्ध केलेल्या आकडेवारीने स्पष्ट केले. ऑगस्ट २०२० मधील २२.७ अब्ज अमेरिकी डॉलरची निर्यात ही गत वर्षी याच महिन्यात झालेल्या २५.९ अब्ज डॉलरच्या निर्यातीच्या तुलनेत १२.९९ टक्के गडगडली आहे.

केंद्रीय वाणिज्य व उद्योग मंत्रालयाने जाहीर केलेल्या आकडेवारीनुसार, देशातून होणारी आयातही ऑगस्टमध्ये २६ टक्क्यांनी  गडगडून २९.४७ डॉलर नोंदली गेली आहे. परिणामी आयात-निर्यातीत तफावत असलेली व्यापार तूट ही ६.७७ अब्ज डॉलर इतकी खालावली आहे. मंगळवारी जाहीर झालेल्या आकडेवारीतील हीच एक दिलासाजनक बाब आहे. गतवर्षी म्हणजे ऑगस्ट २०१९ मध्ये व्यापार तुटीचे प्रमाण सध्याच्या तुलनेत दुप्पट म्हणजे १३.८६ अब्ज इतके होते.

आयातीतील घट मुख्यत्वे तेलाच्या आयात खर्चात कपातीमुळे आहे. खनिज तेलाच्या आंतरराष्ट्रीय किमती घसरल्याने, तेल आयात खर्च हा मागील वर्षांच्या तुलनेत ४१.६२ टक्के घसरून ६.४२ अब्ज डॉलर इतका ऑगस्टमध्ये नोंदविण्यात आला.

सोने आयात खर्च मात्र सुवर्ण धातूच्या आंतरराष्ट्रीय किमतीतील तीव्र स्वरूपाच्या तेजीमुळे मागील तुलनेत दुपटीहून अधिक वाढला आहे. ऑगस्ट २०१९ मधील सोने आयात १.३६ अब्ज डॉलरची होती, ती यंदा ३.७ अब्ज डॉलरवर गेली आहे.

एप्रिल ते ऑगस्ट या पाच महिन्यात निर्यात २६.६५ टक्के गडगडून ९७.६६ अब्ज डॉलरवर मर्यादित राहिली आहे, त्या उलट निर्यात ४३.३६ टक्के घरंगळून ११८.३८ अब्ज डॉलर इतकी नोंदली गेली आहे. दोहोंतील तफावत म्हणजे व्यापार तूट या पाच महिन्यांत २०.७२ अब्ज डॉलर इतकी आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 16, 2020 12:24 am

Web Title: exports fall for sixth straight month abn 97
Next Stories
1 ‘महाजॉब्ज’वर नोंदणी करणाऱ्यांना आता कौशल्य विकास प्रशिक्षण
2 अन्नधान्य महागाईत चढ सुरूच!
3 ‘स्मॉल-कॅप’ना सुदिन!
Just Now!
X