वर्षभरापूर्वी सुचवलेला हा शेअर ‘माझा पोर्टफोलिओ’च्या गुंतवणूकदारांना खूप फायद्याचा ठरला आहे. गुंतवणूकदारांना केवळ १४ महिन्यात २९० टक्के परतावा देणारा एचपीसीएलचा हा शेअर मी अजूनही गुंतवणुकीसाठी का सुचवत आहे, असा प्रश्नदेखील काहींना पडण्याची शक्यता आहे. मात्र गेल्या आर्थिक वर्षांची कंपनीची कामगिरी पाहता यंदाच्या आर्थिक वर्षांकरिता अपेक्षा वाढल्या आहेत. भारतातील तिसऱ्या क्रमांकाच्या या कंपनीच्या मुंबई आणि विशाखापट्टणम येथे रिफायनरीज् असून तिला नवरत्न कंपनीचा दर्जा सरकारने दिला आहे. या खेरीज कंपनी आपल्या ल्युब रिफायनरीतून ल्युब बेस तेल उत्पादन करते. यामध्ये ३००हून अधिक ल्युब उत्पादनांचा समावेश असून ग्रीसचाही समावेश आहे. भारतीय ल्युब बाजारपेठेत एचपीसीएलचा ४० टक्के हिस्सा आहे. या खेरीज मित्तल एनर्जीच्या सहयोगाने पंजाबमधील भठिंडा येथील रिफायनरीमध्ये ४९ टक्के हिस्सा तर एमआरपीएलमध्ये कंपनीची १६.९५ टक्के गुंतवणूक आहे. आपली उत्पादने देशभरात वितरण करण्याकरिता कंपनीने सुमारे ३०१५ किलोमीटर पाइपलाइनचे जाळे विणले आहे.
गेल्या वर्षी भागधारकांना प्रत्येक शेअर्समागे दोन शेअर्स बक्षीस देणाऱ्या एचपीसीएलचे मार्च २०१७ या आर्थिक वर्षांसाठी आलेले निकाल उत्कृष्ट आहेत. कंपनीने १,८६,७०६.६७ कोटी रुपयांच्या उलाढालीवर ६२०८.८० कोटी रुपयांचा नक्त नफा कमावला आहे. गेल्या वर्षीच्या तुलनेत तो ६७ टक्क्य़ांनी जास्त आहे. कंपनीकडून पुन्हा एकदा बक्षीस समभागाची अपेक्षा असून सध्या ५२ आठवडय़ांच्या उच्चांकाच्या जवळपास असलेला हा शेअर अजूनही एक चांगली गुंतवणूक ठरू शकेल.
हिंदुस्तान पेट्रोलियम कॉर्पोरेशन लिमिटेड
(बीएसई कोड – ५००१०४)
लार्ज कॅप समभाग
प्रवर्तक : भारत सरकार
बाजारभाव (रु.) ५३७.१०
उत्पादन/ व्यवसाय पेट्रोलियम
भरणा झालेले भागभांडवल (रु.) १०१५.८८ कोटी
पुस्तकी मूल्य (रु.) २००.३
दर्शनी मूल्य (रु.) १०/-
लाभांश (%) ३००%
प्रति समभाग उत्पन्न (रु.) ६१.१
पी/ई गुणोत्तर ९.३
समग्र पी/ई गुणोत्तर १२.६
डेट/इक्विटी गुणोत्तर १.१६
इंटरेस्ट कव्हरेज गुणोत्तर १७.८४
रिटर्न ऑन नेटवर्थ (%) २२.४७
बीटा १.२
बाजार भांडवल (कोटी रु.) ५७,६४४
५२ आठवडय़ातील उच्चांक/ नीचांक (रु.) ५८४/२६७
शेअर होल्डिंग पॅटर्न (%)
प्रवर्तक ५१.११
परदेशी गुंतवणूकदार १६.८८
बँक/ म्यु. फंड / सरकार ९.५८
इतर २२.४३
सूचना : प्रस्तुत लेखामध्ये सुचविलेल्या कंपनीच्या शेअर्समध्ये लेखकाची वा त्याच्या जवळच्या नातेवाईकांची (उपलब्ध माहितीप्रमाणे) कुठलीही गुंतवणूक नाही किंवा असल्यास ती कंपनीच्या भरणा झालेल्या भागभांडवलाच्या एक टक्क्यापेक्षा कमी आहे. तसेच सुचविलेल्या कंपनीशी लेखकाचा कुठलाही संबंध नसून त्याने कंपनीकडून कुठलेही मानधन अथवा भेटवस्तू घेतलेली नाही.
शेअर बाजारातील व्यवहार हे बाजारातील जोखमीच्या अधीन आहेत. गुंतवणूक करण्यापूर्वी आपल्या गुंतवणूक सल्लागाराचा सल्ला घेणे आवश्यक आहे.
