|| डॉ. श्रीराम गीत माझा मुलगा दहावीला आहे. इंग्रजी माध्यमात तो शिकत आहे. अकरावीला कोणती शाखा घ्यावी, ते त्याचे ठरत नाही. त्याला सायन्सची आवड नाही. त्याला चित्रकला व पखवाजवादन जास्त आवडते. त्या दृष्टीने कोणती शाखा घ्यावी? अजून काय पर्याय आहेत? - सीताराम कोणतीही शाखा घेऊन बारावीमध्ये किमान साठ टक्के मिळवावेत. त्यानंतर चित्रकलेद्वारे फाइन, कमर्शिअल आर्ट, डिझाइन, ग्राफिक्स, इंटिरिअर किंवा अॅनिमेशन अशा क्षेत्रांत प्रवेश परीक्षा देऊनच प्रवेश मिळेल. पखवाजवादन छंद म्हणून जरूर जोपासावे. त्यामध्ये करिअर करताना मात्र विचारपूर्वकच निर्णय घ्यावा, कारण साधना बरीच आहे आणि यशाचा मार्ग खडतर आहे. त्यातून स्वतंत्र प्रगती करणारेही विरळाच दिसतात. मी यंदा बारावीची परीक्षा दिली आहे. मला ऑटोमोबाइल क्षेत्रात करिअर करायचे आहे. काय करावे लागेल? - अंबु घांगले आपण बारावी कोणत्या शाखेतून केली आहे, त्याचा उल्लेख नाही. शिवाय आपल्या गुणांचाही उल्लेख नाही. सीईटी दिली आहे का? त्याचाही तपशील नाही. त्यामुळे डिप्लोमा इन ऑटोमोबाइल इंजिनीअरिंगसाठी प्रवेश घ्यावा एवढेच मोघम लिहीत आहे. यासाठी अर्थातच आधी ते क्षेत्र का आवडते यावर एक पानभर निबंध लिहिण्याचा प्रयत्न तर करून पाहा ना? आवड आणि आकर्षण यात खूपच फरक असतो. मी कायद्याचा अभ्यास करतो आहे. सध्या दुसऱ्या वर्षांला आहे. माझे वय २७ आहे. मी कधीपासून वकिलांकडे उमेदवारी करू शकतो? पदवीनंतर काय काय करू शकतो? कोणत्या संधी आहेत? - महेश देशमुख व नय्यूम पठाण महेश आणि नय्यूम दोघांचे प्रश्न साधारण सारखे असल्याने एकत्र उत्तर देत आहे. जे वकील तुम्हाला मदतनीस म्हणून ये म्हणतील त्यांच्याकडे अगदी उद्यापासून सुरुवात करायला हरकत नाही. पदवीनंतरच्या संधी काम शिकताना कळत जातील. लॉचा उपयोग किमान पंधरा-वीस क्षेत्रांत काम करण्यासाठी होतो.