हिंदू महिलेच्या कुटुंबाने एका मुस्लिम युवकाची हत्या केल्याचा आरोप होतो आहे. मंगळवारी रात्री राजस्थानमधील बिकानेर या ठिकाणी झालेल्या घटनेनंतर ही माहिती समोर आली आहे. एका हिंदू मुलीचे सैफ अली या २२ वर्षांच्या तरुणासोबत प्रेमसंबंध होते. मंगळवारी रात्री ९ च्या सुमारास अली या महिलेला भेटायला रामपुरा बस्ती या ठिकाणी गेला. महिलेच्या कुटुंबीयांना ही माहिती मिळताच त्यांनी या मुस्लिम युवकाला पकडले आणि त्याला अमानुष मारहाण केली. पोलिसांनी दिलेल्या माहितीनुसार या अलीला हिंदू महिलेच्या कुटुंबीयांनी पकडले. त्याला ते करणी इंडस्ट्रीयल भागात घेऊन गेले आणि तिथे त्याला अत्यंत अमानुषपणे मारहाण केली. या मुलाला बेदम मारहाण करण्याचा कटच या सगळ्यांनी आखला होता असेच स्पष्ट होत असल्याचेही पोलिसांनी म्हटले आहे. हिंदुस्थान टाइम्सने या संदर्भातले वृत्त दिले आहे. अलीच्या पाय या हिंदू महिलेच्या कुटुंबीयांनी लाठ्या काठ्यांनी जायबंदी केले. त्याला अत्यंत अमानुषपणे मारहाण केली आणि नंतर त्याला सांडपाण्यात फेकले. हा सगळा प्रकार एका माणसाने पाहिला त्यानंतर प्रत्यक्षदर्शीने पोलिसांना याबाबतची माहिती कळवली. पोलिसांचे पथक त्या ठिकाणी पोहचले त्यांनी अलीला बाहेर काढले आणि रुग्णालयात दाखल केले. मात्र अलीचे पाय गंभीर रित्या जायबंदी झाले होते. डॉक्टरांनी त्याच्यावर उपचार करण्यास सुरुवात केली मात्र उपचारा दरम्यानच त्याचा मृत्यू झाला. आता या प्रकरणी पोलीस पुढील तपास करत आहेत. या मुलाचा मृतदेह शवविच्छेदनासाठी पाठवण्यात आला आहे. शव विच्छेदन अहवाल हाती मिळाल्याशिवाय मृत्यू नेमका कशामुळे झाला ते समजू शकणार नाही असेही पोलिसांनी म्हटले आहे. या प्रकरणी पोलिसांनी बंटी, शिव माली, राजा सोनार, गोपाळ खाटी, बबलु माली या सगळ्यांविरोधात FIR दाखल केला आहे. या सगळ्यांपैकी बंटी हा हिंदू महिलेचा भाऊ आहे. या सगळ्यांपैकी बंटीसह तिघांना पोलिसांनी ताब्यात घेतले आहे अशीही माहिती समजते आहे.
