वृत्तसंस्था, मेलबर्नपश्चिम ऑस्ट्रेलियाच्या किनारपट्टीवरून गुरुवारी १०० हून अधिक लांब पंख असलेल्या पायलट व्हेलना समुद्रात सोडण्यात आले आहे. तर २९ मरण पावल्या असल्याचे अधिकाऱ्यांनी सांगितले. ऑस्ट्रेलियाच्या पार्क्‍स अँड वाइल्डलाइफ सव्‍‌र्हिसने एका निवेदनात म्हटले आहे की, डन्सबरोजवळील टोबी इनलेट येथे १०० हून अधिक लांब पंख असलेल्या व्हेल अडकल्या होत्या. हे वृत्त समजताच वन्यजीव अधिकारी, सागरी शास्त्रज्ञ आणि पशुवैद्यकांची एक टीम घटनास्थळी पोहोचली होती. डन्सबर्ग हे पर्थच्या दक्षिणेस २८५ किलोमीटर अंतरावर समुद्रकिनारी असलेले शहर आहे. अधिकाऱ्यांनी सांगितले की, त्यांना आधी वाटले होते की ३१ व्हेल मरण पावले आहेत, परंतु जैवविविधता, संवर्धन आणि आकर्षण विभागाने नंतर मृ झालेल्या व्हेलची संख्या २९ असल्याचे सांगितले. मृत व्हेलचे शव शार्कला आकर्षित करू नये यासाठी मृत्यू झालेल्या व्हेलना पाण्यातून बाहेर काढण्यात आले आहे. जहाजे आणि एक स्पॉटर प्लेन सुटका केलेल्या व्हेल किनाऱ्यावर परत येतात का त्याचे निरीक्षण करत होते, असे पार्क्‍स अँड वाइल्डलाइफ सव्‍‌र्हिसच्या अधिकाऱ्यांनी सांगितले. व्हेल कशामुळे अडकतात याचे कारण अद्याप शास्त्रज्ञांना सापडलेले नाही. मात्र, असे दिसते की हळूवारपणे उतार असलेल्या, वालुकामय समुद्रकिनाऱ्यांमुळे गोंधळल्या जाऊन त्या अडकतात.
