करोनाने थैमान घातलं असल्याने अनेक देशांमध्ये लॉकडाउन जाहीर करण्यात आलं आहे. यामुळे लोकांच्या गर्दी करण्यावर निर्बंध आले असून लोकांना घरातून बाहेर पडण्यावर बंदी घालण्यात आली आहे. करोनाचा प्रादुर्भाव रोखण्यासाठी लोकांना घरात थांबूनच सण साजरे करण्यास सांगण्यात आलं आहे. आज मुस्लिमांचा ‘शब्ब-ए-बारात’ सण असून यानिमित्ताने पाकिस्तानचे पंतप्रधान इम्रान खान यांनी जगभरातील मुस्लिमांना एक विनंती केली आहे. मुस्लीम धर्मात शब्ब-ए-बारातला वेगळं महत्त्व आहे. शब्ब-ए-बारातच्या रात्री सर्व मुस्लीमधर्मीय कब्रस्थानात जाऊन आपल्या पूर्वजांच्या कबरीवर चादर चढवून तेथे दुआ करतात. मात्र यावेळी करोनामुळे लोकांना घराबाहेर न पडता घरातूनच प्रार्थना करण्याचं आवाहन करण्यात आलं आहे. इम्रान खान यांनी ट्विट करत म्हटलं आहे की, “माझी जगातील सर्व मुस्लिमांना विनंती आहे की, आज रात्री शब्ब-ए-बारातच्या निमित्ताने अल्लाहकडे विशेष प्रार्थना करत आशीर्वाद आणि क्षमा मागा”. I would request Muslims all over the world to offer, tonight, on the occasion of Shab e Baraat special Nuafil prayers to Allah and seek His Blessings and Forgiveness. — Imran Khan (@ImranKhanPTI) April 9, 2020 पाकिस्तानातही करोनाने थैमान घातलं आहे. पाकिस्तानात करोनाचे ४९२६ रुग्ण सापडले आहेत. आतापर्यंत ६३ जणांचा मृत्यू झाला आहे. ४६७ जणांवर उपचार करुन त्यांना घरी पाठवण्यात आलं आहे. करोनाचा सर्वात जास्त फटका पाकिस्तानमधील पंजाब प्रांताला बसला आहे. तिथे करोनाचे २१६६ रुग्ण सापडले आहेत. तर सिंध प्रांतात १०३६, खैबर पख्तून्ख्वां ५६०, गिलगीट बाल्टिस्तान २११ आणि इस्लामाबादमध्ये ८३ रुग्ण सापडले आहेत.