लंडनच्या मध्यवर्ती भागात बुधवारी एक हेलिकॉप्टर कोसळून झालेल्या दुर्घटनेत किमान दोघे जण ठार झाले, तर अन्य दोघे जखमी झाले. थेम्स नदीच्या तीरावरील एका उंच इमारतीवर असलेल्या क्रेनवर आदळून सदर हेलिकॉप्टर कोसळले.लंडनमधील थेम्स नदीच्या तीरावर सेंट जॉर्ज व्हार्फ ही निवासी इमारत असून तिचे बांधकाम सुरू होते. या इमारतीवरील क्रेनला धडक दिल्यानंतर ते कोसळले. त्यामध्ये दोन ठार आणि दोन जखमी झाले असून जखमींना हॉस्पिटलमध्ये दाखल करण्यात आले आहे.सदर हेलिकॉप्टरमध्ये केवळ वैमानिकच होता, त्यामध्ये प्रवासी नव्हते. वैमानिकाबाबत त्वरित माहिती मिळू शकलेली नाही. हेलिकॉप्टर कोसळल्याने दोन गाडय़ांचे नुकसान झाले. वॉण्डसवर्थ मार्गावर ही दुर्घटना घडली. घटनेचे वृत्त कळताच अग्निशामक दलाचे ६० बंब घटनास्थळी रवाना झाले.
