Charlie Kirk : चार्ली कर्क यांच्या हत्या प्रकरणातील संशयित टायलर रॉबिन्सन कोण आहे? मोठी माहिती समोर

कर्क यांच्या हत्या प्रकरणात वापरण्यात आलेली रायफल एफबीआयने गुरुवारी जप्त केली होती. तसेच संशयिताचे काही फोटो प्रसिद्ध करण्यात आले होते. आता या प्रकरणातील संशयित आरोपीची ओळख पटवण्यात आली असून एका २२ वर्षीय संशयिताला अटक करण्यात आली आहे. चार्ली कर्क यांच्या हत्येमागील संशयिताची ओळख टायलर रॉबिन्सन अशी झाली आहे. या संदर्भातील वृत्त फायनान्शिअल एक्स्प्रेसने दिलं आहे.

टायलर रॉबिन्सन कोण आहे? (Tyler Robinson)

चार्ली कर्क यांच्या हत्या प्रकरणात टायलर रॉबिन्सन हा मुख्य संशयित आरोपी असून त्याची चौकशी करण्यात येत असल्याचं एफबीआयने म्हटलं आहे. रॉबिन्सनने या घटनेतील त्याचा सहभाग कबूल केल्याची माहिती समोर येत आहे. चार्ली कर्क यांच्या दृष्टिकोनांबद्दल रॉबिन्सनच्या मनात द्वेष होता. रॉबिन्सनच्या सहभागाबाबत अजून तपास करण्यात येत असून आणखी काही गोष्टी समोर येण्याची शक्यता आहे.

चार्ली कर्क कोण होते?

रूढीवादी विचारांची थेटपणे मांडणी करणारे चार्ली कर्क हे डोनाल्ड ट्रम्प यांचे जवळचे सहकारी होते. करोना महामारीबद्दल त्यांनी चुकीची माहिती पसरवली होती, तसेच हवामान बदल असा काही प्रकारच नसल्याचाही त्यांचा दावा होता. सीएनएनच्या वृत्तानुसार, मागच्या वर्षी अमेरिकेत झालेल्या अध्यक्षीय निवडणुकीत कर्क यांच्यामुळे ट्रम्प यांना तरूणांचा मोठा पाठिंबा मिळाला होता. याबद्दल ट्रम्प यांनी त्यांचे जाहीर कौतुक केले होते.

कर्क यांच्या मृत्यूनंतर वृत्तवाहिनीवर बोलत असताना ट्रम्प यांनी चार्ली कर्क देशभक्त असल्याचं म्हटलं होतं. स्वातंत्र्य, लोकशाही, न्याय आणि अभिव्यक्ती स्वातंत्र्याच्या आग्रहामुळे कर्क यांनी लाखो अमेरिकन तरूणांना प्रेरित केलं होतं. त्यांच्या कुटुंबियाप्रती आम्ही संवेदना व्यक्त करतो. तसेच मारेकऱ्यांना शोधून त्यांना योग्य शिक्षा देईपर्यंत आम्ही शांत बसणार नाही, अशी खात्री देतो, असं ट्रम्प यांनी म्हटलं होतं.