हैदराबाद : तेलंगण विधानसभा निवडणुकीत सत्ताधारी भारत राष्ट्र समितीचा (बीआरएस) पराभव होईल असा विश्वास काँग्रेस नेते राहुल गांधी यांनी गुरुवारी व्यक्त केला. पक्षातर्फे राज्यात काढण्यात आलेल्या ‘विजयभेरी’ यात्रेदरम्यान राहुल यांनी भूपालपल्ली ते पेद्दापल्लीला जाताना राहुल गांधी यांनी कोपरा सभा घेतली. तेलंगणामधील निवडणूक ही राजा आणि प्रजा यांच्यादरम्यानची आहे असे म्हणत त्यांनी सत्ताधारी बीआरएसवर टीका केली. तेलंगणामध्ये मोठय़ा प्रमाणात भ्रष्टाचार असल्याचा आरोप राहुल यांनी केला. राज्यात दहा वर्षे सत्तेत राहिल्यानंतरही मुख्यमंत्री के चंद्रशेखर राव स्वत:ला जनतेपासून दूर ठेवतात असा आरोप राहुल यांनी केला.
