जनरल मोटर्सकडून अनेक कामगारांना नारळ

भारतातील ‘शेव्हर्लेट टव्हेरा’ जातीच्या सुमारे एक लाख १४ हजार कार माघारी बोलावण्याप्रकरणी कंपनीच्या धोरणाचे उल्लंघन केल्याचा ठपका ठेवत ‘जनरल मोटर्स’ या अमेरिकास्थित कंपनीने आपल्या अनेक कर्मचाऱ्यांना कामावरून काढून टाकले आहे.
‘शेव्हर्लेट टव्हेरा’ जातीच्या मोटारींची बांधणी आणि विक्री केवळ भारतासाठीच ठरलेली असताना त्यामध्ये कंपनीच्या धोरणाचे उल्लंघन झाल्याची बाब उघडकीस आली असल्याचे ‘जनरल मोटर्स’च्या प्रवक्त्याने एका ई-मेल निवेदनाद्वारे स्पष्ट केले.  कंपनीचे भारतातील माजी प्रमुख आणि विक्री व पणन विभागाचे विद्यमान उपाध्यक्ष राजीव चाबा यांनाही कामावरून कमी करण्यात आल्याचे वृत्त पसरले होते परंतु चाबा यांनी त्याचा इन्कार केला. मी सध्या अमेरिकेत सुटीवर असून चीनमधील माझ्या कार्यालयात मी ५ ऑगस्टपासून रुजू होईन, असे त्यांनी सांगितले.