मला अटक केल्यास आंदोलन चिघळेल : हार्दिक पटेलांचा भाजपला इशारा

गुजरातमधील पाटीदार समाजाच्या आंदोलनाप्रकरणी हार्दिक पटेलविरोधात राज्याच्या विविध पोलीस ठाण्यांमध्ये गुन्हे दाखल आहेत. यातील २०१५ मधील भाजप आमदाराच्या कार्यालयावरील हल्ल्याप्रकरणी मेहसाणा जिल्ह्यातील न्यायालयाने हार्दिक पटेलविरोधात अजामीनपात्र अटक वॉरंट काढले होते.

‘इंडिया टुडे’ या वृत्तवाहिनीला हार्दिक पटेल यांनी मुलाखत दिली असून यात त्यांनी भाजपला थेट इशारा दिला आहे. गुजरात निवडणुकीच्या पार्श्वभूमीवर हार्दिक पटेल यांची कोंडी करण्याचे गुजरात सरकारचे प्रयत्न सुरु असल्याची चर्चा आहे. या पार्श्वभूमीवर हार्दिक पटेल म्हणाले, पोलिसांनी मला अटक करण्याचा प्रयत्न केल्यास आंदोलन चिघळेल. राज्यातील लाखो हार्दिक माझ्या पाठिशी असून आता हे जनतेचे आंदोलन आहे, असा दावा त्यांनी केला. पाटीदार समाजाच्या हक्कासाठी आंदोलन असून यामागे राजकीय हेतू नाही. अन्यायाविरोधात आमचा लढा सुरु आहे, असे त्यांनी सांगितले.

मी काँग्रेसची बी टीम असल्याचा आरोप भाजप करत आहे. त्यांनी एक गोष्ट स्पष्ट करावी की, काँग्रेसची बी टीम नेमकी कोण?, मी की संपूर्ण पाटीदार समाज ?, भाजप राज्यातील प्रश्नांवर ते काहीच बोलत नाही, असे हार्दिक पटेल यांनी म्हटले आहे. दुसरीकडे हार्दिक पटेल हे गुरुवारी न्यायालयात हजर झाले. त्यांना न्यायालयाने पाच हजार रुपयांच्या जातमुचलक्यावर जामीन मंजूर केल्याचे वृत्त आहे. मी लवकरच राहुल गांधींची भेट घेणार आहे, असे त्यांनी म्हटले आहे.