दिल्लीत मुसळधार पावसाने वाहतूक ठप्प

राजधानी दिल्लीलाही मुसळधार पावसाने धुवून काढले. सलग साडेचार तास चाललेल्या पावसामुळे दिल्लीतील बहुतांश रस्त्यांना नद्यांचे स्वरुप आले आणि जवळजवळ सर्वच रस्त्यांवर वाहतूक कोलमडून पडली. भारताची शान मानल्या जाणाऱ्या जागतिक दर्जाच्या इंदिरा गांधी आंतरराष्ट्रीय विमानतळाच्या आत पाण्याचे तळे बनले. मेट्रो रेल्वेच्या काही स्थानकांमध्ये पावसाचे पाणी शिरले. मोतीनगर भागातील एका सिनेमागृहाच्या बालकनीतही पाणी साचले.
पावसाच्या पाण्याच्या निचऱ्याची कोणतीही व्यवस्था नसल्यामुळे पाच तासांच्या अतिवृष्टीमुळे आयटीओ, मिंटो रोड, चिराग दिल्ली, लक्ष्मीनगर, मोतीबाग, द्वारका, डिफेन्स कॉलनी, साऊथ एक्सटेंशन आदी भागांमध्ये गुडघाभर पाणी साचले. अनेक घरांमध्ये पाणी शिरले. मथुरा रोड, पुराना किला रोड, अकबर रोड, कॅनॉट प्लेस, आश्रम, धौला कुआँ, करोलबाग, पहाडगंज, आझादपूर मार्केट, नेहरू प्लेस, आयआयटी आदी भागांमध्ये पावसामुळे वाहतूक ठप्प झाली होती. रस्त्यांवर दोन ते अडीच फूट पाणी साचल्यामुळे कारचालकांची पंचाईत झाली. अनेक मोटरगाडय़ा रस्त्यांवरच बंद पडल्या आणि बहुतांश रस्त्यांवर चार ते पाच किमी लांब गाडय़ांच्या रांगा लागल्या. देशातील बडय़ा राजकीय नेत्यांची निवासस्थाने असलेल्या ल्युटन्स दिल्लीलाही पावसाने धुवून काढले. भाजप नेते मुरली मनोहर जोशी यांच्या बंगल्यासमोरचा रस्ता प्रवाही नदी बनली होती.