चेन्नईत एका रेल्वे स्थानकावर इन्फोसिसमध्ये काम करणारया महिलेची शुक्रवारी भर दिवसा धारधार शस्त्रांनी अज्ञाताकडून हत्या करण्यात आली. धक्कादायक गोष्ट म्हणजे, घटना घडली त्यावेळी रेल्वे स्थानकावर बऱयापैकी प्रवासी उपस्थित होते. तरीसुद्धा या महिलेला वाचविण्यासाठी कोणीच पुढे सरसावले नाही. एस.स्वाथी नावाची महिला शुक्रवारी सकाळी साडेसहाच्या सुमारास चेन्नईतील नुनगंबकम रेल्वे स्थानकावर उभी असताना एका अज्ञाताने तिच्या चेहरा आणि मानेवर धारधार शस्त्राने वार केले आणि तेथून पसारा झाला, अशी माहिती पोलिसांनी दिली. स्वाथी आपल्या नियोजित वेळेनुसार कामावर जात असताना हा प्रकार घडल्याचेही सांगण्यात येत आहे. तिचा मृतदेह शवविच्छेदनासाठी पाठविण्यात आला असून, या प्रकरणाची सविस्तर चौकशी केली जात असल्याचे पोलिसांनी सांगितले.
