Israel Iran Attacks Highlights: इस्रायलनं हल्ल्यांची व्याप्ती वाढवली, आता तेहरानसह अरक आणि खांदाबवरही हल्ले होणार!

दरम्यान, इराणच्या आण्विक तळांवर सर्व परिस्थिती चांगली आणि नियंत्रणात असल्याचं इराणच्या आण्विक कार्यक्रमाचे प्रमुख इस्लामी यांनी स्पष्ट केलं आहे. रॉयटर्सनं यासंदर्भातलं वृत्त दिलं आहे. एकीकडे इस्रायलकडून सातत्याने इराणच्या आण्विक तळांवर हल्ले चढवण्याचे दावे केले जात असतानाच इराणकडून हे निवेदन जारी करण्यात आलं आहे.

“इस्रायलकडून इराणच्या शांततापूर्ण आण्विक तळांवर होणारे हल्ले हे आंतरराष्ट्रीय कायद्याचं उल्लंघन आहे. यामुळे आंतरराष्ट्रीय सुरक्षेला मोठा धोका निर्माण झाला आहे. इस्रायलच्या हल्ल्यांनी जगाला आण्विक युद्धाच्या उंबरठ्यावर आणून ठेवलं आहे”, अशी भूमिका रशियाच्या परराष्ट्र मंत्रालयानं काढलेल्या निवेदनात नमूद करण्यात आली आहे.

इस्रायलकडून इराणवर हल्ला करण्यात आल्यानंतर त्यावर जर्मनीनं भूमिका मांडली आहे. "इराणला धडा शिकवण्याचं काम इस्रायल आमच्यासाठी करत आहे. आम्हीदेखील इराणच्या शासनकर्त्यांच्या अत्याचारांचे पीडित आहोत. इराणमधील या राज्यकर्त्यांनी जगभरात मृत्यू आणि विध्वंस आणला आहे", अशी प्रतिक्रिया जर्मनीचे चॅन्सलर फ्रेडरिक मार्झ यांनी दिली आहे.

इस्रायल-इराण संघर्षातून या दोन्ही देशांंचं मोठं नुकसान होत असताना दुसरीकडे कच्च्या तेलाच्या किमतींवर त्याचा विपरीत परिणाम होताना दिसत आहे. मंगळवारी कच्च्या तेलाच्या किमती तब्बल ४ टक्क्यांनी वाढल्यानंतर बुधवारी देखील त्यात वाढ झाली असून प्रतिबॅरल किमती ७५ डॉलर्सच्या वर गेल्या आहेत.

इस्रायल व इराण यांच्यातील संघर्ष टोकाला गेला असताना दुसरीकडे अमेरिकेनं आक्रमक भूमिका घेतली आहे. अमेरिकेनं इस्रायलला पाठिंबा दिलेला असताना आता मध्य पूर्व आशियात मोठ्या संख्येनं अमेरिकन फायटर जेट्स दाखल होऊ लागले आहेत. यात प्रामुख्याने F-16, F-22 आणि F-35 या लढाऊ विमानांचा समावेश आहे. रॉयटर्सनं यासंदर्भातलं वृत्त दिलं आहे.

व्हॉट्सअॅपकडून आपली माहिती इस्रायलला पुरवली जात असल्याचा दावा इराणकडून केला जात असून इराणनं बुधवारी आपल्या नागरिकांना मोबाईलमधून व्हॉट्सअॅप अनइन्स्टॉल करण्याचे निर्देश दिले आहेत.

दरम्यान, इराणनं इस्रायलवर त्यांचं संहारक फतेह क्षेपणास्त्र डागल्याचा दावा इराणमधील प्रसारमाध्यमांनी केला आहे. फतेह मिसाईल हे एक हायपरसॉनिक मिसाईल असून ते मॅक ५ अर्थात आवाजाच्या वेगाच्याही पाचपट वेगाने लक्ष्यभेद करते, असा दावा सीएनएननं केला आहे.

इस्रायल-इराण संघर्षाच्या पार्श्वभूमीवर अमेरिकेनं जेरुसलेममधील आपला दूतावास येत्या शुक्रवारपर्यंत बंद ठेवण्याचा निर्णय घेतला आहे. या काळात जेरुसलेमसह तेल अवीवमधील कॉन्सुलेट्सही बंद असतील, असंही अमेरिकेकडून स्पष्ट करण्यात आलं आहे.

इराणच्या लष्करानं इस्रायलच्या हवाई तळांवर हल्ले केल्याच्या वृत्ताला दुजोरा दिला आहे. याच तळांवरून इराणवर ड्रोन व क्षेपणास्त्रे डागण्यात आली होती, असा दावा इराणनं केला आहे. हा हल्ला टप्प्याटप्प्याने आक्रमकता वाढवत नेणाऱ्या बहुआयामी युद्धमोहिमेचा एक भाग आहे, असंही इराणनं स्पष्ट केलं आहे.