पाकच्या गोळीबारात दोन नागरिकांचा मृत्यू

सीमारेषेवर पाकिस्तानी रेंजर्सने गुरुवारी रात्री पुन्हा शस्त्रसंधीचे उल्लंघन केले. पाक रेंजर्सने उखळी तोफांचा माराही केला. आर. एस. पुरा, अरनिया, रामगड, सांबा या भागांमधील बीएसएफच्या सुमारे ६० चौक्यांना पाक रेंजर्सनी लक्ष्य केले. याचा फटका सीमेलगच्या निवासी भागालाही बसला. आर. एस. पुरा सेक्टरमध्ये बचनोदेवी आणि सुनील कुमार या दोघांचा गोळीबारात मृत्यू झाला. तर चार जण यात जखमी झाले असून जखमींवर रुग्णालयात उपचार सुरु आहेत. शुक्रवारी सकाळपर्यंत गोळीबार सुरुच होता. शस्त्रसंधीच्या उल्लंघनाच्या पार्श्वभूमीवर सीमारेषेवरील गावांमधील शाळांना सुट्टी जाहीर करण्यात आली आहे. तसेच गावातील रुग्णालयांनाही सतर्क राहण्याचे आदेश देण्यात आले आहे.

बुधवारी रात्री देखील पाक सैन्याने शस्त्रसंधीचे उल्लंघन केले. यात बीएसएफचा एक जवान आणि सीमेलगतच्या गावात राहणाऱ्या १९ वर्षांच्या तरुणीचा मृत्यू झाला होता. भारतीय सैन्याने सडेतोड प्रत्युत्तर देत पाकच्या दौन चौक्या उद्ध्वस्त केल्या. भारताच्या प्रत्युत्तरात १७ पाक सैनिक ठार झाल्याचे वृत्त आहे. मात्र पाक सैन्याने हा दावा फेटाळून लावला. गोळीबारात दोन महिलांचा मृत्यू झाला. तर पाच जण जखमी झाले, असे पाक सैन्याच्या प्रवक्त्यांनी म्हटले होते.