मुस्लिमांची टोपी घातल्याने कोणाच्याही धर्मावर परिणाम होत नाही, या शब्दांत अभिनेते रझा मुराद यांनी शुक्रवारी गुजरातचे मुख्यमंत्री नरेद्र मोदी यांचे नाव न घेता त्यांच्यावर निशाणा साधला. 
दोन वर्षांपूर्वी मुस्लिम धर्मगुरू सय्यद इमाम शाही सय्यद यांनी मोदी यांचे सदभावना उपोषण सुरू असलेल्या ठिकाणी जाऊन त्यांना मुस्लिमांची टोपी भेट देऊन ती घालण्याचा प्रयत्न केला. मात्र, मोदींनी त्यावेळी ती टोपी घालण्यास नकार दिला होता. ईदनिमित्त भोपाळमध्ये आयोजित करण्यात आलेल्या कार्यक्रमात मध्य प्रदेशचे मुख्यमंत्री शिवराजसिंह चौहान सहभागी झाले होते. त्यांनी यावेळी मुस्लिमांची टोपी घातली होती. हेच औचित्य साधत रझा मुराद यांनी नाव न घेता मोदींवर निशाणा साधला. त्यांनी (मोदींनी) चौहान यांच्याकडून काहीतरी शिकले पाहिजे आणि मुस्लिमांची टोपी घालण्याला विरोध केला नाही पाहिजे, असे रझा मुराद म्हणाले. देशातील सर्वोच्च पदावर जायचे असेल, तर सर्व समाजाला बरोबर घेऊन जावे लागते, असा टोलाही त्यांनी मोदी यांना लगावला.