‘बिहारने मोदींचे फटाके चोरले’; पाकिस्तानी प्रसारमाध्यमांचा मोदींना टोला

बिहारमध्ये भाजपचा पराभव झाल्यास पाकिस्तानात फटाके फुटतील, हे भाजप अध्यक्ष अमित शहांचे विधान बिहार विधानसभा निवडणुकीच्या प्रचारादरम्यान प्रचंड गाजले होते. मात्र, बिहारमधील दारूण पराभवानंतर शहांच्या याच विधानाचा धागा पकडून अनेक पाकिस्तानी वृत्तपत्रांनी मोदींना लक्ष्य केले आहे. विकासाच्या मुद्द्यापासून सुरू झालेला भाजपचा प्रचार अखेरच्या टप्प्यात जातीय आणि धार्मिक राजकारणापर्यंत जाऊन पोहचला होता. भाजपच्या प्रचाराची बदललेली हीच रणनीती अमित शहांच्या पाकिस्तानसंदर्भातील विधानातून अधोरेखित झाली होती. त्यामुळेच मोदी आणि शहा यांच्याभोवती केंद्रित असलेल्या बिहार निवडणुकीत भाजपचा पराभव झाल्यानंतर सोमवारी बहुतांश पाकिस्तानी प्रसारमाध्यमे मोदींना लक्ष्य करताना दिसली. पाकिस्तानील प्रसिद्ध ‘डॉन’ या वृत्तपत्राने बिहारने मोदींचे फटाके चोरले, अशा मथळ्याखाली बिहार निवडणुकीच्या निकालांची बातमी प्रसिद्ध केले आहे.