वेदना असह्य़ झाल्या व आपण आप्तांसाठी ओझे आहोत असे वाटू लागले किंवा आपल्याकडून आता जगाला देण्यासारखे काही उरलेले नाही याची खात्री पटली, तर वैद्यकीय मदतीने आत्महत्येचा मार्ग पत्करण्याचा विचार करू, असे मत ख्यातनाम विश्वरचना शास्त्रज्ञ स्टीफन हॉकिंग यांनी व्यक्त केले आहे.
 हॉकिंग ७३ वर्षांचे असून गेल्या अनेक वर्षांपासून मोटर न्यूरॉन डिसीजने आजारी आहेत. हॉकिंग यांनी सांगितले, की एखाद्याला त्याच्या इच्छेविरोधात जिवंत ठेवणे हे योग्य नाही. २०१३ मध्ये त्यांनी असे म्हटले होते की, ज्यांचे जगणे अवघड झाले आहे त्यांना साहाय्यभूत आत्महत्येचा मार्ग खुला असला पाहिजे. त्याचा गैरवापर मात्र होता कामा नये.
बीबीसीला दिलेल्या मुलाखतीत त्यांनी सांगितले की, आपल्याला एकटेपणाची भावना जाणवते. तुम्ही काय गमावलेत असे विचारले असता त्यांनी सांगितले की, मी व्यवस्थित असतो तर पोहायला जाण्याची इच्छा होती. जेव्हा माझी मुले तरूण होती तेव्हा त्यांच्याशी मला शारीरिक अर्थाने खेळता आले नाही, त्याची खंत वाटते.