IPL MI vs SRH Live Updates: IPL 2020च्या शेवटच्या साखळी सामन्यात हैदराबादने मुंबईला १० गडी राखून पराभूत केले आणि 'प्ले-ऑफ्स'मध्ये दिमाखात प्रवेश केला. कायरन पोलार्डने ४१ धावा करत मुंबईला १४९ धावांपर्यंत मजल मारून दिली होती. या आव्हानाचा पाठलाग करताना हैदराबादने सामन्यावर निर्विवाद वर्चस्व गाजवलं. सलामीवीर डेव्हिड वॉर्नर आणि वृद्धिमान साहा या दोघांनी दमदार फलंदाजी करत संघाला विजय मिळवून दिला. A 10-wicket win over #MumbaiIndians as @SunRisers Qualify for #Dream11IPL 2020 Playoffs. pic.twitter.com/j1Ib16fw6b — IndianPremierLeague (@IPL) November 3, 2020 'प्ले-ऑफ्स'मध्ये गुरूवारी मुंबई विरूद्ध दिल्ली तर शुक्रवारी हैदराबाद विरूद्ध बंगळुरू असे सामने रंगणार आहेत. पहिल्या सामन्यातील विजेता थेट अंतिम फेरीत जाईल. तर पहिल्या सामन्यातील पराभूत संघ दुसऱ्या सामन्यातील विजेत्याशी खेळेल. त्यातून अंतिम फेरीतील दुसरा संघ निवडला जाईल. A look at the Road To The Final for #Dream11IPL 2020 pic.twitter.com/Zrz7Su7qa4 — IndianPremierLeague (@IPL) November 3, 2020 असा रंगला सामना. नाणेफेक जिंकून हैदराबादच्या संघाने मुंबईला प्रथम फलंदाजीस आमंत्रित केलं. दुखापतीनंतर संघात परतलेला कर्णधार रोहित शर्मा ४ धावांवर तर क्विंटन डी कॉक २५ धावांवर बाद झाला. सूर्यकुमार यादव (३६) आणि इशान किशन (३३) यांनी चांगली खेळी केली, पण मोठी धावसंख्या उभारण्यात ते अपयशी ठरले. कृणाल पांड्या (०) आणि सौरभ तिवारीही (१) झटपट माघारी परतले. अखेर शेवटच्या टप्प्यात कायरन पोलार्डने २ चौकार आणि ४ षटकार खेचत ४१ धावा केल्या आणि संघाला १४९ पर्यंत मजल मारून दिली. हैदराबादकडून संदीपने ३, होल्डर-नदीमने २-२ आणि राशिदने १ बळी टिपला. पोलार्डची धडाकेबाज खेळी. १५० धावांच्या माफक आव्हानाचा पाठलाग करताना हैदराबादच्या सलामीवीरांची आक्रमक सुरूवात केली. डेव्हिड वॉर्नर आणि वृद्धिमान साहा या दोघांनी पॉवर-प्लेच्या षटकांत अर्धशतकी भागीदारी केली. मुंबईच्या गोलंदाजांची धुलाई करत त्यांनी ६ षटकात ५६ धावा केल्या. डावाच्या १२व्या षटकात फिरकीपटू राहुल चहरच्या पहिल्याच चेंडूवर वॉर्नरने षटकार लगावत आपलं अर्धशतक साकारलं. तर त्याच षटकात चौथ्या चेंडूवर साहाने एकेरी धाव अर्धशतक केलं. त्यानंतर वॉर्नरने धावगती वाढवत धमाकेदार नाबाद ८५ धावांची खेळी केली. त्याने १० चौकार आणि १ षटकार लगावला. वृद्धिमान साहानेही ७ चौकार आणि १ षटकार लगावत नाबाद ५८ धावा केल्या आणि त्याला चांगली साथ दिली.