व्यावसायिकाला तेवीस लाखांचा गंडा कोल्हापूर : बँकेतून बोलत असल्याची बतावणी करत भामटय़ाने बँकेच्या खातेदाराकडून ‘ओटीपी’ क्रमांकाची माहिती घेत बँकेच्या खात्यातून परस्पर २३ लाख ४८ हजार रुपये काढून व्यावसायिकांची फसवणूक केल्याची घटना उघडकीस आली. याबाबत शिवगौंडा भीमगौंडा पाटील (रा. उजळाईवाडी) यांनी पोलिसांत फिर्याद दिली. शिवगौंडा पाटील हे व्यावसायिक आहेत. शनिवारी पाटील हे कसबा बावडा येथून उजळाईवाडी या ठिकाणी घरी जात होते. दरम्यान, घरी जात असताना वाटेतच पाटील यांना एका मोबाइलवरून फोन आला. त्या व्यक्तीने आपण ‘स्टेट बँक ऑफ इंडिया’तून बोलत असून, तुमचे खाते बंद झाल्याचे सांगितले. ते पुन्हा सुरू करण्यासाठी पाटील यांच्या मोबाइलवर लिंक पाठवून ती ओपन करण्यास सांगितले. लिंक ओपन केल्यावर संशयिताने पाटील यांच्या बँक खात्याची माहिती घेतली. पाटील यांची फसवणूक करून ओटीपी क्रमांक मिळवून त्याधारे भामटय़ाने त्यांच्या खात्यातील ‘ऑनलाइन’ पद्धतीने २३ लाख ४८ हजार रुपये काढून घेतले. आपली फसवणूक झाल्याचे लक्षात येताच पाटील यांनी कोल्हापूर सायबर पोलीस ठाण्यात तक्रार दाखल केली आहे, असे पोलिस निरीक्षक संजय मोरे यांनी सांगितले.