ऐतिहासिक शस्त्र संग्राहक गिरीश जाधव यांचे निधन

आज त्यांच्या संग्रहात शिवकाळातील तलवारी, भाले, गुप्त्या, कट्यारी व सुरा, खंजीर, जंबिया, बिचवा, बर्ची, वाघनखे अशी हत्यारे आहेत.

कोल्हापूर : ज्येष्ठ ऐतिहासिक शस्त्र संग्राहक गिरीश लक्ष्मण जाधव ( वय ७३) यांचे मंगळवारी जयसिंगपूर येथे निधन झाले. त्यांनी राज्य तसेच राज्याबाहेर फिरून ऐतिहासिक शस्त्रांचा विपुल संग्रह केला आहे. शिवकालीन शस्त्र हा त्यांच्या अभ्यासाचा विषय होता. त्यांच्या मागे पत्नी, मुलगा, मुलगी, नातवंडे असा परिवार आहे.

जाधव हे मूळचे जयसिंगपूरचे. जयसिंगपूर नगरपालिकेचे माजी नगराध्यक्ष लक्ष्मण जाधव हे त्यांचे वडील. त्यांना महाविद्यालयीन दशेपासूनच शस्त्र संग्रहाचा छंद लागला होता. त्यासाठी त्यांनी कोल्हापूर जिल्ह्यात मोठी भ्रमंती केली होती. पुढे १९८० सालापासून त्यांच्यातील शस्त्रास्त्र संग्रहाची चुणूक दिसून आली. ते पुणे येथे राहत असताना त्यांना मिळालेली कट्यार त्यांनी शिवशाहीर बाबासाहेब पुरंदरे यांना दाखवली असता त्यांनी ती शिवकाळातील असल्याचे  सांगितले होते. या एका शस्त्राने त्यांच्या या संग्रहवृत्तीने मोठा गती घेतली. पुढे ते मुंबईत स्थायिक झाल्यावर त्यांनी राज्यभर तसेच राज्याबाहेर फिरून मोठ्या प्रमाणात ही ऐतिहासिक शस्त्रे गोळा केली. आज त्यांच्या संग्रहात शिवकाळातील तलवारी, भाले, गुप्त्या, कट्यारी व सुरा, खंजीर, जंबिया, बिचवा, बर्ची, वाघनखे अशी हत्यारे आहेत. जुने बाण, तोफेचे गोळे आहेत. या सर्व संग्रहाचे त्यांनी प्रदर्शने भरवून या ऐतिहासिक वारशाबाबत समाजप्रबोधनाचे कामही केले.

मृत्युंजयकार शिवाजी सावंत यांचे आशीर्वाद त्यांना लाभले होते. त्यांची या विषयावरील निष्ठा पाहून अनेकांनी स्वत:कडील शस्त्रे त्यांना भेट म्हणून दिली. संग्रह वाढवतानाच या शस्त्रांचे ऐतिहासिक महत्त्व, विविध संदर्भग्रंथांचे वाचन करून त्यांनी या विषयात सखोल अभ्यास केला होता.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व कोल्हापूर बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Historical arms collector girish jadhav passes away akp

Next Story
‘बीएसएनएल’च्या केबलची चोरी करणारी टोळी जेरबंद
ताज्या बातम्या