अ‍ॅशेस कसोटी क्रिकेट मालिका : जागतिक कसोटी गोलंदाजांच्या क्रमवारीत अग्रस्थानी विराजमान असलेल्या पॅट कमिन्सने रविवारी लौकिकाला साजेशी कामगिरी केल्यामुळे ऑस्ट्रेलियाने चौथ्या अ‍ॅशेस कसोटी क्रिकेट सामन्यात इंग्लंडला १८५ धावांनी धूळ चारली. या विजयासह ऑस्ट्रेलियाने प्रतिष्ठेचा अ‍ॅशेस करंडक त्यांच्याकडेच राखून पाच सामन्यांच्या मालिकेत २-१ अशी आघाडी घेतली. २०१७च्या अ‍ॅशेस मालिकेत ऑस्ट्रेलियाने ४-० असे यश मिळवले होते. ऑस्ट्रेलियाने दिलेल्या ३८३ धावांच्या लक्ष्याचा पाठलाग करताना इंग्लंडचा दुसरा डाव १९७ धावांत आटोपला. शनिवारच्या २ बाद १८ धावांवरून पुढे खेळताना इंग्लंडच्या जेसन रॉय आणि जो डेन्ली यांनी सावध सुरुवात केली. दोघांनी तिसऱ्या गडय़ासाठी ६६ धावांची भागीदारी रचली; परंतु कमिन्सचे दुसऱ्या स्पेलमध्ये आगमन होताच इंग्लंडचा डाव कोसळला. कमिन्सने सलग दुसऱ्या डावात रॉयचा बॅट आणि पॅडमधून (३१) त्रिफळा उडवला, तर पाच षटकांच्या अंतरातच त्याने धोकादायक बेन स्टोक्सला अवघ्या एका धावेवर बाद करून इंग्लंडला अडचणीत टाकले. डेन्लीने अर्धशतक झळकावून इंग्लंडला सावरण्याचा प्रयत्न केला, परंतु नॅथन लायनने त्याला ५३ धावांवर बाद करून ऑस्ट्रेलियाचा मार्ग अधिक सोपा केला. ५ बाद ९३ धावांवरून जॉनी बेअरस्टो आणि जोस बटलर यांनी सहाव्या गडय़ासाठी महत्त्वपूर्ण ४५ धावा जोडल्या. मात्र मिचेल स्टार्कने बेअरस्टोला (२५) पायचीत पकडून इंग्लंडला सहावा धक्का दिला. अखेरच्या सत्रात इंग्लंडला ३६ षटके फलंदाजी करणे आवश्यक होते. जोस बटलर आणि क्रेग ओव्हरटर्न यांनी सातव्या गडय़ासाठी महत्त्वपूर्ण ३४ धावांची भर घालतानाच १० षटके खेळून काढल्यामुळे यजमान सामना वाचवण्यात अपयशी ठरणार, असे वाटू लागले. परंतु जोश हॅझलवूडने बटलरचा ३४ धावांवर त्रिफळा उडवला आणि संपूर्ण स्टेडियममध्ये शांतता पसरली. अखेरीस हॅझलवूडने ओव्हर्टनला पायचीत पकडले आणि ऑस्ट्रेलियाच्या सर्व संघाने एकच जल्लोष केला. संक्षिप्त धावफलक ऑस्ट्रेलिया (पहिला डाव) : ८ बाद ४९७ डाव घोषित इंग्लंड (पहिला डाव) : ३०१ ऑस्ट्रेलिया (दुसरा डाव) : ६ बाद १८६ डाव घोषित इंग्लंड (दुसरा डाव) : ९१.३ षटकांत सर्व बाद १९७ (जो डेन्ली ५३, जोस बटलर ३४; पॅट कमिन्स ४/४३). सामनावीर : स्टीव्ह स्मिथ
