भारताचा माजी बॉक्सर डिंको सिंग यांना करोनाची लागण झाली आहे. त्यांनी १९९८ मध्ये झालेल्या आशियाई क्रीडा स्पर्धांमध्ये सुवर्णपदकाची कमाई करणारे डिंको सिंग यांचा रविवारी करोना अहवाल प्राप्त झाला. त्यात ते करोना पॉझिटिव्ह असल्याचे स्पष्ट झाल्याचे वृत्त पीटीआयने दिले. त्यांनी नुकताच दिल्लीहून मणिपूरचा प्रवास केला. दिल्लीहून निघताना त्यांची चाचणी करण्यात आली होती. त्यावेळी ते तंदुरूस्त होते, मात्र मणिपूरला आल्यानंतर करण्यात आलेल्या चाचणीत ते करोना पॉझिटिव्ह आढळले. डिंको सिंग सध्या कर्करोगाशी झुंजत आहेत, त्यातच त्यांना करोनाची लागण झाली आहे. ४१ वर्षीय निवृत्त बॉक्सर डिंको सिंग हे यकृताच्या कर्करोगाशी झुंजत आहेत. मार्च महिन्यात त्यांच्यावर दिल्लीत रेडिएशन थेरपीचे उपचार करण्यात येणार होते. त्यासाठी बॉक्सिंग फेडरेशनच्या हवाई रूग्णवाहिकेने त्यांना दिल्लीला नेण्यात आले. पण लॉकडाउनच्या पहिल्या टप्प्यामुळे त्यांच्यावरील उपचारांची तारीख पुढे ढकलण्यात आली. वैद्यकीय उपचारानंतर ते मणिपूरला परतले. त्यावेळी त्यांना काविळ झाल्याचे निदान झाले होते. अशा स्थितीत त्यांना २,४०० किलोमीटरचा प्रवास करून मणिपूरला यावे लागले.
