विजय क्लब आयोजित पुरुष राज्यस्तरीय कबड्डी स्पध्रेत ‘क’ गटात रंगलेल्या रोमहर्षक सामन्यात मुंबईच्या गोल्फादेवी संघाने अवघ्या एका गुणाच्या फरकाने ठाणे-वाशीच्या ग्रिफीन संघाचा पराभव केला. दादर शिवाजी पार्क येथील महाराष्ट्र राज्य कबड्डी असोसिएशनच्या कार्यालयासमोरील पटांगणात झालेल्या इतर लढतीत साहसी, विजय नवनाथ यांनी सलामी दिली. पुरुषांच्या ‘क’ गटात गोल्फादेवी आणि ग्रिफिन यांच्यातील लढत चुरशीची झाली. मध्यंतरापर्यंत १०-१० अशा समसमान गुणात असलेल्या या लढतीत गोल्फादेवीने २४-२३ असा विजय मिळवला. लक्ष्मण दोलतडे, पुनित गदमले यांच्या झंझावती चढाया, तर धनंजय सरोजच्या उत्कृष्ट पकडी या विजयात महत्त्वाच्या ठरल्या. उपनगरच्या साहसीने मुंबईच्या साऊथ कॅनराचा २८-२५ असा निसटता पराभव करीत ‘ब’ गटात आगेकूच केली. पराग मोरे, अक्षय शेवडे, किरण देवाडिगा यांच्या खेळाच्या जोरावर साहसीने सामना जिंकला. याच गटात शेवटी झालेल्या सामन्यात मात्र साऊथ कॅनराने अंकुरला १५-१० असे नमवीत बाद फेरी गाठण्याचे आपले आव्हान कायम राखले. गौरव शेट्टी, डी. प्रतिकने हा विजय मिळवून दिला. ‘ड’ गटात विजय नवनाथने उपनगरच्या गुरुदत्तचा २२-८ असा धुव्वा उडविला. सागर कुऱ्हाडे, मयूर खामकर, संजय राणे, योगेश सुर्वे यांच्या नेत्रदीपक खेळाने विजय नवनाथने सामना जिंकला.