नवी दिल्लीत सुरु असलेल्या नेमबाजी विश्वचषक स्पर्धेत भारताच्या अपूर्वी चंदेलाने सुवर्णपदकाची कमाई केली आहे. 10 मी. एअर रायफल प्रकारात अपूर्वीने भारताला विश्वचषक स्पर्धेत पदकाची कमाई करुन देत धडाकेबाज सुरुवात करुन दिली आहे. या स्पर्धेत भारताच्या अंजुम मुद्गील आणि एल्वेनिल वेल्वेरियन या खेळाडूही उतरल्या होत्या. मात्र पात्रता फेरीचा अडथळा दूर करत अपूर्वीने अंतिम फेरीत प्रवेश मिळवला. पात्रता फेरीत अपूर्वीने 629.3 गुणांची कमाई करत चौथं स्थान पटकावलं. अंतिम फेरीत अपूर्वीची सुरुवात चांगली झाली नव्हती, मात्र वेळेतच तिने स्वतःला सावरत पुनरागमन केलं. दुसऱ्या आणि तिसऱ्या प्रयत्नात अपूर्वीने आपल्या कामगिरीत अधिक सुधारणा करत सर्वोत्तम स्थान गाठलं. यानंतर अपूर्वीने आपल्या कामगिरीत सातत्य कायम राखत चीनी खेळाडूंची झुंज मोडीत काढून सुवर्णपदकाची कमाई केली. चीनच्या रुओझू झाओने रौप्य तर हाँग झूने कांस्य पदकाची कमाई केली.
