प्रो-कबड्डीच्या सातव्या हंगामात बंगाल वॉरियर्सने आपलं विजयी अभियान कायम राखलं आहे. नवी दिल्लीच्या त्यागराज स्पोर्ट्स कॉम्प्लेक्समध्ये झालेल्या सामन्यात बंगाल वॉरियर्सने तामिळ थलायवाजवर ३५-२६ ने मात केली. बचावफळीचं अपयश आजच्या सामन्यात तामिळ थलायवाजला चांगलंच भोवलं. बंगालच्या संघाने अष्टपैलू खेळ केला. के. प्रपंजन आणि मणिंदर सिंह यांनी चढाईमध्ये तामिळ थलायवाजच्या संघाचे कच्चे दुवे हेरून काढले. प्रपंजनने सामन्यात चढाईमध्ये १० तर मणिंदर सिंहने ९ गुणांची कमाई केली. तामिळ थलायवाजचे अनुभवी बचावपटू या जोडगोळीवर अंकुश ठेवू शकले नाहीत. ज्याचा फायदा घेत बंगालने सामन्यावर आपलं वर्चस्व राखलं. तामिळ थलायवाजकडून कर्णधार अजय ठाकूरने एकाकी झुंज दिली. भरवशाचा राहुल चौधरीही या सामन्यात आपल्या लौकिकाला साजेसा खेळ करु शकला नाही. शब्बीर बापूने अजयला चांगली झुंज दिली, तामिळ थलायवाजच्या बचावफळीनेही आज पुरती निराशा केली.
