अंतिम फेरीत आज सिमोना हॅलेपशी झुंज लंडन : विम्बल्डन खुल्या टेनिस स्पर्धेच्या महिला एकेरीत अमेरिकेची सेरेना विल्यम्स आणि रोमानियाची सिमोना हॅलेप विजेतेपदासाठी शनिवारी एकमेकींशी झुंजतील. सात वेळा विजेतेपद पटकावणाऱ्या सेरेनाला आता २४वे ग्रँडस्लॅम जेतेपद खुणावत आहे. सेरेनाने गुरुवारी बाबरेरा स्ट्रायकोव्हाला सहज धूळ चारत ११व्यांदा विम्बल्डनच्या अंतिम फेरीत मजल मारली. हॅलेपने एलिना स्वितोलिनाचे आव्हान सहजपणे परतवून लावत अंतिम फेरीत खेळण्याचा मान पटकावला. सेरेना आणि हॅलेप यांच्यात १० लढती झाल्या असून त्यात ९ वेळा सेरेनाने विजय मिळवला आहे. हॅलेपने चार वेळा ग्रँडस्लॅम स्पर्धेची अंतिम फेरी गाठली असून गेल्या वर्षी तिने फ्रेंच खुल्या टेनिस स्पर्धेचे अजिंक्यपद पटकावले होते.
