विश्वचषक स्पर्धेतील आव्हान संपुष्टात आल्यानंतर पाकिस्तान क्रिकेट संघाचा कर्णधार मिसबाह उल हक व अष्टपैलू खेळाडू शाहीद आफ्रिदी यांनी एक दिवसीय सामन्यांमधून निवृत्ती जाहीर केली आहे. त्यामुळे एकदिवसीय क्रिकेटचे कर्णधारपद रिक्त झाले असून यासाठी शोहेब मकसूद व फवाद आलम उत्सुक आहेत. पाकिस्तान क्रिकेट मंडळामधील एका विश्वसनीय सूत्राने दिलेल्या माहितीनुसार कामरान अकमल व शोएब मलिक यांच्या पुनरागमनाची शक्यता कमी आहे. साहजिकच सद्यस्थितीत शोहेब व फवाद यांच्यापैकी एकाची कर्णधारपदी वर्णी लागण्याची शक्यता आहे. मिसबाह व आफ्रिदी यांनी देशासाठी केलेल्या कामगिरीचे कौतुक करीत मंडळाचे अध्यक्ष शहरियार खान यांनी या खेळाडूंना सन्मानपूर्वक निरोप दिले जातील, असे जाहीर केले आहे. तसेच युनिस खानवरही निवृत्तीसाठी दबाव आणला जात आहे.
